សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ រួបរួមជាមួយធុរកិច្ចជន ទាំងក្នុង និងក្រៅប្រទេស ពង្រីកសក្ដានុពលទៅក្នុងសមាហរណកម្មអាស៊ាន តំបន់ និងបណ្ដាប្រទេសជាច្រើនលើពិភពលោក
សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ ត្រូវបានអនុញ្ញាតដោយក្រសួងមហាផ្ទៃ តាមប្រកាស លេខ ១២២០ ប្រ.ក ចុះថ្ងៃទី១ ខែឧសភា ឆ្នាំ២០២១ ដើម្បីឱ្យដំណើរការបេសកកម្មរបស់ខ្លួនក្នុងគោលដៅ រួមចំណែកសកម្មភាពមនុស្សធម៌ វប្បធម៌ និងកិច្ចការសង្គម ព្រមទាំងជួយសម្របសម្រួល និងគាំទ្រដល់សមាជិកសមាគមក្នុងកិច្ចសហប្រតិបត្តិការសម្ព័ន្ធភាព ក្នុងភាពជាដៃគូជាមួយអាជីវករក្រៅប្រទេស សំដៅបង្កលក្ខណៈវាស្រួលក្នុងកិច្ចការអភិវឌ្ឍន៍សង្គមកម្ពុជា និងជាពិសេសជាងនេះទៅទៀត ចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍន៍សេដ្ឋកិច្ចប្រទេសកម្ពុជា ស្របតាមគោលនយោបាយយុទ្ធសាស្ត្របញ្ចកោណរបស់រាជរដ្ឋាភិបាល។
សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ នេះ ជាសសរស្តម្ភមួយក្នុងចំណោមសសរស្តម្ភជាច្រើន ដែលរួមដៃប្រយុទ្ធលើវិស័យសេដ្ឋកិច្ចជាមួយរាជរដ្ឋាភិបាលកម្ពុជា ដែលបានផ្ដល់កាលានុវត្តភាពសម្រាប់ធុរកិច្ចជន គឺច្បាប់វិនិយោគ និងគោលការណ៍លើកទឹកចិត្ត មានបត់បែន សម្រាប់អាជីវករ ពាណិជ្ជករ និងវិនិយោគិន ទាំងក្នុង និងក្រៅប្រទេស សំដៅពង្រឹងពង្រីក ក្រុមហ៊ុន សហគ្រាសនានា បង្កើនប្រាក់ចំណូលដល់សកម្មភាពអាជីវកម្មផ្សេងៗ ក៏ដូចប្រាក់ចំណូលដល់ប្រជាពលរដ្ឋតាមរយៈផ្ដល់កន្លែងការងារ។
ក្នុងចក្ខុវិស័យសេដ្ឋកិច្ច ដែលយើងត្រូវរួបរួមគ្នាពង្រឹងពង្រីកគុណភាព អាជីវកម្ម ពាណិជ្ជកម្ម និងវិនិយោគនោះ សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ ក៏នឹងជួយសម្របសម្រួល គាំទ្រដល់សមាជិកសមាគមក្នុងកិច្ចសហប្រតិបត្តិការ សម្ព័ន្ធភាព ក្នុងភាពជាដៃគូជាមួយអាជីវករក្រៅប្រទេស សំដៅបង្កលក្ខណៈងាយស្រួលក្នុងការចូលរួមធ្វើឱ្យមានស្ថិរភាពក្នុងកិច្ចអភិវឌ្ឍន៍សេដ្ឋកិច្ច-សង្គមជាតិ។ ប្រឹក្សាយោបល់ផ្នែកច្បាប់ និងជួយណែនាំក្នុងការបំពេញឯកសារផ្លូវច្បាប់ដល់សមាជិកសមាគម នៅពេលដែលសមាជិកមានបំណងចង់បង្កើត ឬធ្វើសកម្មភាពពាណិជ្ជកម្មក្នុងប្រទេសកម្ពុជា, ក្នុងនោះ មានការពារសិទ្ធិ និងផលប្រយោជន៍ស្របច្បាប់របស់សមាជិក និងជាស្ពានតភ្ជាប់រវាងពាណិជ្ជករកម្ពុជា និងពាណិជ្ជករបរទេស ក្នុងសកម្មភាពវិនិយោគ ផលិតភាព ពាណិជ្ជកម្ម និងសេវាកម្ម មកកាន់ប្រទេសកម្ពុជា។
សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ នឹងប្រើប្រាស់សក្ដានុពលរបស់ខ្លួនទៅក្នុងសមាហរណកម្មសេដ្ឋកិច្ចអាស៊ាន តំបន់ និងបណ្ដាប្រទេសជាច្រើនទៀតលើពិភពលោក និងធ្វើយ៉ាងណាប្រែក្លាយសមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិមួយនេះ ទៅជាសហគមន៍សេដ្ឋកិច្ចសម្រាប់វិស័យឯកជន សហការជាមួយរាជរដ្ឋាភិបាល ដូចដែលរាជរដ្ឋាភិបាលបានកំណត់ក្នុងផែនការ គ្រប់ភាគីធុរកិច្ចជន ជាឆ្អឹងខ្នងនៃសេដ្ឋកិច្ចកម្ពុជា។ ក្នុងន័យនេះ យើងចូលរួមលើកកម្ពស់ទីផ្សារ ស្វែងរកទិផ្សារ , ពង្រឹងគុណភាពមូលដ្ឋាន និងការផលិត , ប្រកួតប្រជែងសេដ្ឋកិច្ចកម្រិតខ្ពស់ , អភិវឌ្ឍន៍សេដ្ឋកិច្ចប្រកបដោយសមធ៌ម , ជាពិសេស សមាហរណកម្មអាជីវកម្ម ពាណិជ្ជកម្ម វិនិយោគ ទៅក្នុងសេដ្ឋកិច្ចពិភពលោក៕