លោកជំទាវឧកញ៉ា ជីប យុទ្ធារី ប្រធាន ” សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ ” បានដឹកនាំក្រុមការងារ ចុះធ្វើទស្សនកិច្ចនៅទីតាំងក្រុមហ៊ុនរោងចក្រទំណាប់ស្វាយ ដើម្បីស្វែងយល់ និងបានឃើញផ្ទាល់ភ្នែកអំពីចង្វាក់ផលិតកម្ម ក្នុងគោលបំណងកៀងគរសមាជិកចូលក្នុងសមាគមន៍ ក៏ដូចស្វែងរកដៃគូរពាណិជ្ជកម្ម អាជីវកម្ម និងជួយស្វែងរកកន្លែងការងារជូនប្រជាកសិករ និងទីផ្សារ-តម្លៃ ដែលកសិករដាំ ឬផលិត ហើយលក់ឱ្យរោងចក្រនេះ។
ដំណើរទស្សនកិច្ចនេះបានធ្វើឡើងនាពេលថ្មីៗនេះ ចុះដល់ផ្ទាល់ទីតាំងរោងចក្រ ឈ្មោះ ខេមបូឌាន ស៊ីង ខេន ស៊ី ភីន ឯ.ក គ្រប់គ្រងដោយជនជាតិចិន ផលិតតំណាប់ស្វាយ និងស្វែងរកទិញចូលនៅផ្លែស្វាយល្អៗមានគុណភាពពីប្រជាកសិករទៀតផង, ស្ថិតនៅភូមិតាំងស្រឹង ឃុំសង្កែសាទប ស្រុកឪរ៉ាល់ ខេត្តកំពង់ស្ពឺ។ បច្ចុប្បន្នរោងចក្រផលិតតំណាប់ស្វាយមួយនេះ មានបុគ្គលិកបម្រើការតែចំនួនជាង ១០០នាក់ប៉ុណ្ណោះ ហើយមានតម្រូវការបុគ្គលិកបន្ថែមជាង ១០០នាក់ទៀត, នេះបើតាមការឱ្យដឹងពីសំណាក់ លោកជំទាវឧកញ៉ា ជីប យុទ្ធារី ប្រធាន ” សមាគមអភិវឌ្ឍន៍សហប្រតិបត្តិការសេដ្ឋកិច្ចកម្ពុជា-អន្តរជាតិ ” ។
លោកជំទាវឧកញ៉ាប្រធានសមាគម បានឱ្យដឹងទៀតថា រោងចក្រផលិតតំណាប់ស្វាយ ខេមបូឌាន ស៊ីង ខេន ស៊ី ភីន ឯ.ក នេះ បានប្រមូលទិញផលិតផលផ្លែស្វាយពីប្រជាកសិករខ្មែរ រួចហើយកែច្នៃជាតំណាប់ស្វាយ នាំចេញទៅទីផ្សារប្រទេសចិន, សព្វថ្ងៃរោងចក្រកមានគំរោងពង្រីកការប្រមូលទិញស្វាយស្រស់ប្រចាំថ្ងៃពី ៦០តោន ទៅដល់ ១០០តោនក្នុងមួយថ្ងៃ នៅឆ្នាំ២០២៧ខាងមុខ។ ដូច្នេះគោលបំណងលោកជំទាវប្រធានសមាគម ដែលមកទស្សនកិច្ចនៅរោងចក្រនេះ គឺដូចបានជម្រាបពីខាងលើរួចមកហើយ ក្រៅពីពិនិត្យមើលផ្ទាល់ពីចង្វាក់ផលិតកម្ម គឺដើម្បីកៀងគរ ក្រុមហ៊ុន សហគ្រាស រោងចក្រផ្សេងៗចូលជាសមាជិករបស់សមាគម និងស្វែងរកដៃគូរអាជីវកម្មជូនប្រជាកសិករខ្មែរ និងធុរជនផ្សេងៗ។
ជាចុងក្រោយ លោកជំទាវប្រធានសមាគម បានឱ្យដឹងថា លោកជំទាវ បានជម្រាបជូនពីតម្រូវការកម្មកររបស់រោងចក្រ ខេមបូឌាន ស៊ីង ខេន ស៊ី ភីន ឯ.ក ខាងលើ ទៅក្រសួងការងារ និងបណ្ដុះបណ្ដាលវិជ្ជាជីវៈរួចរាល់ហើយ, ហើយក្រសួងសម្ដែងនូវភាពរីករាយសហការ និងស្នើសុំកិច្ចសហការពីលោកជំទាវវិញផងដែរ, ដូច្នេះធ្វើឱ្យលោកជំទាវប្ដេជ្ញាថា ក្នុងនាមប្រធានសមាគម នឹងយកចិត្តទុកដាក់លើការងារផ្គូផ្គងអ្នកប្រមូលទិញស្វាយដែលជាសមាជិករបស់សមាគម នាំទៅរោងចក្រផលិតតំណាប់ខាងលើ៕
